Twilight Over Burma – မှုန်ရီဆိုင်း တိုင်းမြန်မာ

ဒီစာအုပ်အကြောင်းကလည်း ဇာတ်ကြောင်းရော၊ စာအုပ်ရော ပြောထားသူတွေအများကြီးရှိပြီးသားဆိုတော့ ကိုယ်ဖတ်ဖြစ်ခဲ့ပုံပဲပြန်ပြောပြတော့မယ်။ ၂၀၂၂ တုန်းကပါ။ နိုင်ငံခြားတက္ကသိုလ်တစ်ခုမှာ ကျောင်းတက်နေချိန်၊ ပရော်ဖက်ဆာအသစ်က နိုင်ငံခြားသားဆရာမပဲ။သူ့ကိုအကုန်လုံးကရှိန်ကြတယ်။ ကိုယ်ကလည်း ပထမဆုံး အတန်းရှိတဲ့နေ့မှာ ၅ မိနစ် နောက်ကျရော။ တကယ်က ရှေ့တစ်တန်းက ပြီးတာ နောက်ကျတာပါ။ ပရော်ဖက်ဆာက သိပ်မကျေ နပ်လှဘူး။ ဒါပေမဲ့ ရှေ့တစ်တန်းကမပြီးတာဆိုတော့ သူလည်းဘာမှတော့လုပ်မရဘူးပေါ့။

အတန်းထဲမိတ်ဆက်ကြတော့မှ ကိုယ်က မြန်မာ က လာတာပါ၊ သမိုင်းဘွဲ့ရထားပါတယ် ဘာညာ ထည့်ပြောမှ သူ့အကြည့်ကပြောင်းသွားတာ။ သူမြန်မာပြည်ကို ကောင်းကောင်းသိတယ်တဲ့။ ကိုယ်ကလည်း ဟုတ်ကဲ့ပါ လောက်ပေါ့။ ဒီတိုင်းမြန်မာသတင်းတွေလည်းတက်နေတဲ့အချိန်မို့ ထင်ထားတာ။

သူက အားလုံးမိတ်ဆက်ပြီးတော့ကျ ဆက်ပြောတယ်။ သူ့ကို ဂျာမန်စာသင်ပေးတဲ့ဆရာမကြောင့်ပါတဲ့။ သူက အဲဒီဆရာမကို သိပ်ချစ်တယ်တဲ့။နတ်သမီးပုံပြင်လိုမျိုး သိပ်လှတဲ့ ဒါပေမဲ့ ကြေကွဲရတဲ့ဇာတ်လမ်းလေးတစ်ပုဒ်လည်း သူ့ဆရာမဆီမှာ ရှိတယ်တဲ့။ ဘယ်သူလဲဆိုတော့မှ

“A Princess” တဲ့။

အဲဒီနောက်တော့ ပထမဆုံး အတန်းချိန်ရဲ့ တစ်ဝက်ကျော်ဟာ မြန်မာပြည်ထဲက ကြေကွဲဖွယ် အချစ်ဇာတ်လမ်းတစ်ပုဒ်အကြောင်း ပြောဖို့ဖြစ်သွားတယ်။ သီပေါစော်ဘွားရဲ့ မဟာဒေဝီ Inge အကြောင်းပေါ့။ တကယ်တမ်း သူ အဲဒါပြောချိန်မှာ ကိုယ်က Twilight Over Burma ကိုမဖတ်ဖူးသလို ရုပ်ရှင်တောင်သေချာမကြည့်ဖူးဘူး။ စော်ဘွားရဲ့အကြောင်း ရံဖန်ရံခါ online ပေါ်မှာတွေ့မိဖတ်မိရုံလောက်ပဲရှိတာ။ ပရော်ဖက်ဆာက တအားကိုတက်ကြွနေတယ်။ သူက Story Telling လည်းတော်တော့ အတန်းထဲက အားလုံးကလည်း စိတ်ဝင်စားလာတယ်။ တကယ်လည်း ရုပ်ရှင်တွေထဲကလိုပဲမလား။

နိုင်ငံခြားမှာကျောင်းလာတက်ရင်း ဖူးစာဆုံခဲ့ပြီးသူ့နိုင်ငံလိုက်သွားတော့မှ သူက သာမန်အမျိုးသား မဟုတ်ဘဲ အုပ်ချုပ်သူစော်ဘွား တစ်ယောက် – ဩဇာအာဏာလွှမ်းသူတစ်ယောက် ဆိုတာကို သိလိုက်ရတာကိုး။ နိုင်ငံခြားသူတစ်ယောက်က ရှမ်းစော်ဘွားရဲ့မဟာဒေဝီအဖြစ် ဒေသနေလူထုရဲ့ချစ်ခင်လေးစားခြင်းကိုပါရခဲ့တာ။ နောက်တော့ သတင်း အစအနတောင် မသိရတော့ဘဲ ခွဲခွါရပြန်တယ်။

ပရော်ဖက်ဆာက အဲဒီပုံပြင်ကို သူသိနေတဲ့ အကြောင်း ပြောပြရတာ စိတ်လှုပ်ရှားနေခဲ့တယ်။ အဲဒီနောက် မြန်မာပြည်ရဲ့ “Diversity”အကြောင်း ဆက်ဆွေးနွေးကြတယ်။ ပထမဆုံးအတန်းချိန်က ည ၇ နာရီမှစတာဆိုပေမဲ့ အားလုံးက အိပ်ငိုက်မနေတော့ဘဲ စိတ်ပါလက်ပါ ဆွေးနွေးကြသလို သူတို့လာရာ နိုင်ငံတွေရဲ့အနေအထားနဲ့ပါ ပြောပြကြတယ်။

ကိုယ့်အတွက်တော့ အဲဒီ ပထမဆုံး အတန်းချိန်က တကယ် မမေ့နိုင်စရာပါပဲ။ စော်ဘွားနဲ့ မဟာဒေဝီရဲ့ ဇာတ်ကြောင်းကိုလည်း ပိုသိအောင် ဖတ်မယ်လို့ ဆုံးဖြတ်ခဲ့တယ်။

Twilight Over Burma ကိုပဲ မူကွဲ ၃ မျိုးလောက်ထိထွက်တယ်ထင်တယ်။ ကိုယ့်မှာရှိတာကတော့ ဒီ မှုန်ရီဆိုင်း တိုင်းမြန်မာ ပါ။

သီပေါမြို့၊ ဘော်ကြိုဘုရား၊ နမ္မတူမြစ် နဲ့ စခန်းသာ စတဲ့နေရာတွေကို စိတ်ထဲကနေ တမ်းတမ်းတတနဲ့သွားချင်စိတ်ဖြစ်လာတဲ့အထိပဲ။ ဖတ်ရတာ ချောလို့လည်းပါသလို အကြောင်းအရာကလည်း ကောင်းလို့ပါ။

ဖတ်ကြည့်သင့်တဲ့စာအုပ်ပါပဲ။

အားလုံးပဲကြည်လင်တဲ့နေ့လေးဖြစ်ပါစေရှင်။